Hotel No Kos Laos Dalan Uniku Maibe Bele Mos Kontribui Ba Transmisaun HIV

CNCS-TL News – Diretór Programasaun Comissão Nacional de Combate ao HIV-SIDA de Timor Leste (CNCS-TL), Venâncio Coelho esplika Hotel no Kos-kosan (Uma Aluga) ne’e laos uniku dalan ba atividade relasaun seksual livre ka uniku dalan ba transmisaun virus HIV iha Timor Leste, maibe atividade relasaun seksual livre nebe hala’o iha fatin rua refere mos iha kontribuisaun ba transmisaun virus HIV husi ema ida ba ema seluk.

Nia dehan asuntu ne’e hodi hatan ba preokupasaun individual ka organizasaun balun nian kona ba servisu deseminasaun informasaun husi CNCS-TL ba publiku.

Diretór ne’e dehan Komisaun foti exemplu ida maka Hotel ka Kos-kosan hanesan fatin ba atividade ransu no seksu livre hodi kontribui mos ba kazu transmisaun virus HIV, maibe laos iha indikasaun katak transmisaun virus HIV ne’e barak liu da’et iha Kos-kosan ka Hotel.

“Ita hatene katak husi relatoriu dadus HIV-SIDA nebe iha transmisaun virus HIV barak liu da’et ba ema liu husi relasaun seksual livre, tanba ne’e ami hanoin mos katak atividade relasaun seksual livre iha Hotel ka Kos-kosan ne’e mos kontribui”, Nia hatan kestaun ne’e ohin 28 Fevereiru 2020 iha Universidade Oriental Timor Lorosa’e (UNITAL)

Venâncio haktuir iha pesoal balun maka uza fatin Hotel ka Kos-kosan hanesan fatin ba transaksaun relasaun seksual livre nebe hala’o laos ho sira nia parseiru seksual rasik maibe ho ema seluk, situasaun ne’e iha mos risku ba transmisaun virus HIV.

“Ita haree ate agora seidauk iha pesoal ida maka iha kompetensia tomak atu halo kontrola ba situasaun ne’e, so uniku dalan ida maka ita tenke husu ba Governu hodi kria kondisaun hotu atu kontrola mos atividade hirak ne’e”, Coelho kontinua esklarese hodi hatan ba preokupasaun pesoal balun nian

CNCS-TL la’os atu husu ba Governu hodi bandu ema halo relasaun seksual iha Kos-kosan, maibe presiza iha regulamentu ruma ba Kos-kosan sira, nune’e bele fasil atu halo kontrola ema halo relasaun seksual livre nebe laos ho sira nia kaben.

“Pelumenus ba alin feto estudante sira nebe hakarak hela iha kos labele kahur malu ho kos mane nia, kria mos orariu visita, atu bele evita ema halo ransu livre no seksu livre”, katak Diretór ne’e

Nia haktuir inisiativa Komisaun nian laos atu bandu ema loke Kos-kosan, maibe atu kria kondisaun nebe diak liu atu bele evita ona ransu livre no seksu livre nebe kontribui mos ba transmisaun virus HIV.  (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password