CNCS-TL – MdS Kapasita Pesoal Saúde SSM Manufahi Kona ba Atendimentu Ba EMHIV

CNCS-TL News – Comissão Nacio­nal de Combate ao HIV-SIDA de Timor Leste (CNCS-TL) serbisu hamutuk ho Ministério da Saúde (MdS) liu husi Unidade Nasional Programa HIV-SIDA, organiza refreshing training hodi fo kapasitasaun ba pesoal saúde, parteira no Serbisu laboratorium Serbisu Saúde Munisipiu Manufahi kona ba oinsa bele fo atendimentu ne’ebe diak liu ba Ema Moris ho HIV-SIDA (EMHIV).

Atividade refreshing training refere hala’o durante loron rua husi dia 2 – 3 Outobru 2019, iha Salaun Igreja Presbiteriana Same – Munisipiu Manufahi no hetan partisipasaun kuaze 35 pesoas.

Ba partisipante sira Sekretariu Ezekutivu CNCS-TL Rev. Daniel Marçal hatete bainhira profesional saúde sira iha kuinhesimentu diak kona ba atendimentu ba EMHIV, bele redus problema stigma no diskriminasaun iha futuru.

Nia hatutan atendimentu ba EMHIV sensitivu liu duké atende ema ho moras seluk.

“Dalaruma ita esforsu masimu ona, maibe EMHIV sira sei nafatin senti iha stigma no diskriminasaun ba sira”, haktuir Rev. Daniel Marçal

Marçal esplika problema stigma no diskriminasaun afeita tebes ba maluk afetadu HIV-SIDA sira atu asesu ba tratamentu ARV (Anti Retroviral).

“Ita hotu hakarak problema stigma no diskriminasaun ne’e bele redus ona para ajuda ita nia maluk positivu HIV-SIDA sira bele iha vontade fali ba halo tratamentu ARV”, katak Sekretariu Ezekutivu ne’e

Iha fatin hanesan reprezentante Unidade Nasional Programa HIV-SIDA Ministeriu da Saúde, Marta Abenia do Santos hatete treinamentu ne’e meius ida atu fo kapasitasaun ba ita nia pesoal saúde sira Munisipiu Manufahi iha area ART (Anti Retro Viral Teraphy) no HCT (HIV/AIDS Counseling Testing) hodi bele fo atendimentu ba EMHIV.

“Hanesan profesional saúde, ita presiza fo atendimentu ne’ebe diak ba ita nia komunidade sira atu labele mosu tan stigma no diskriminasaun”, dehan Marta

Marta mos agradese ba inisiativa CNCS-TL ne’ebe fo kapasitasaun ba pesoal saúde Manufahi nian kona ba atendimentu ba EMHIV liu liu atendimentu iha area ART  no HCT.

Nia husu ba profesional Saúde Manufahi nian atu aproveita oportunidade ne’e hodi hasa’e kuinhesimentu atu bele atende EMHIV ho diak liu iha futuru.

Marta hatutan bainhira EMHIV sira senti hakmatek ho atendimentu ne’ebe diak, sira sei la lakon husi tratamentu. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password