CNCS-TL Fahe Informasaun HIV-SIDA Ba Estudante SOLS Becora

CNCS-TL News – Komisaun Nasional Kombate HIV-SIDA Timor Leste, Quarta feira orseik (11 Setembru 2019), organiza kampanha sensiblizasaun ida hodi fahe informasaun HIV-SIDA no informasaun seluk ne’ebe relevante ho moras sira hada’et husi relasaun seksual (MHRS) ba estudante sira kuaze 500 ne’ebe agora dadaun tuir hela kursu ingles iha SOLS Nasional Becora.

Diretór Programasaun CNCS-TL, Venâncio Coelho agradese ba koperasaun, tanba maske iha agenda ne’ebe okupadu maibe organizasaun SOLS nafatin iha vontade diak atu simu pedidu husi CNCS-TL hodi fahe informasaun HIV-SIDA no informasaun MHRS ba estudante sira.

“Hanesan estudante no foinsa’e, imi presiza tebes atu buka hatene kona ba informasaun HIV-SIDA no MHRS, hodi bele halo prevensaun”, katak  Diretór ne’e

Nia esplika dala barak ema hada’et virus HIV tanba menus kuinhesimentu kona ba oinsa transmisaun virus ne’e husi ema ida ba ema seluk.

Ba estudante sira ne’ebe maioria foinsa’e, Venâncio Coelho husu atu uza tempu barak liu ba aprende no estuda tanba dezenvolvimentu futuru nasaun ida ne’e nian iha foinsa’e sira nia liman.

“Se imi involve an iha seksu livre, iha oportunidade atu kaben sedu, isin rua sedu no bele mos lakon imi futuru”, haktuir Diretór ne’e

Coelho mos husu  ba estudante sira atu labele identiku domin ho seksu, atu nune’e lebele monu lalais ba seksu tanba seidauk tempu atu halo seksu.

Iha fatin hanesan Diretora Nasional SOLS Timor Leste, Grasiana Herculano agradese mos ba CNCS-TL, tanba bele fahe ona informasaun HIV-SIDA ba estudante SOLS sira.

“Ita nia alin sira ne’e mos presiza tebes atu aprende buat hotu hotu, inklui mos aprende kona ba informasaun HIV-SIDA”, katak Diretora Nasional ne’e

Nia dehan iha futuru sei kolabora ho komisaun hodi nafatin fahe informasaun HIV-SIDA ba estudante sira ne’ebe tuir hela kursu ingles iha organizasaun SOLS. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password