Maske Mundu Defisil, Maibe Natarbora Oan Tenke Bele Rezolve Problema HIV-SIDA

CNCS-TL News –  Sekretariu Ezekutivu Comissão Nacio­nal de Combate ao HIV-SIDA de Timor Leste (CNCS-TL) Rev. Daniel Marçal hatete maske to’o ohin loron mundu defisil atu kombate problema HIV-SIDA, maibe Autoridade lokal no komunidade Postu Administrativu Natarbora tenke bele rezolve problema HIV-SIDA iha Postu refere.

“Mundu inklui Timor Leste seidauk bele rezolve, maibe Autoridade lokal hamutuk ho komunidade sira, tenke prevene movimentasaun virus ne’e mai to’o iha Natarbora”, katak Marçal bainhira abertura seminariu sensiblizasaun refere iha Postu Administrativu Natarbora, 5 Setembru 2019

Nia salienta tan katak atu prevene oinsa ne’e, fila fali ba konsensia ema ida-idak nia an, tanba virus ne’e la nara-naran da’et ba ema sekuandu ema la ba buka ka la involve an iha hahalok risku sira.

“Ita la involve an iha ransu no seksu livre no la halo transfusaun ran arbiru, virus HIV mos sei la hada’et mai ita”, katak Rev. Daniel Marçal

Komisariu ne’e esplika liu husi rona informasaun mos bele kuinhese ona oinsa atu halo prevensaun.

Nia mos hatutan liu husi programa sosializasaun ne’e bele taka dalan ba movimentasuan virus ne’e iha Postu Administrativu Natarbora.

Nunee mos Chefe Centro Saúde Postu Administrativu Natarbora, Casmiro da Costa Gomes alerta liu tan katak atu prevene movimentasaun virus HIV, ne’e mak sira nia parte konvida prezensa CNCS-TL iha Postu refere hodi halo sosializasaun informasaun ba lideransa autoridade lokal no komunidade sira.

“Tanba ami hanoin katak so ho informasaun mak ita bele prevene komunidade husi virus ne’e”, dehan Casmiro

Nia agradese ba Komisaun ne’ebe organiza ona seminariu sensiblizasaun hodi hasa’e konsensia komunidade nian ba prevensaun HIV-SIDA.

Entretantu iha aktividade ofisial iha Postu Administrativu Natarbora, CNCS-TL serbisu hamutuk ho Serbisu Saúde Municipiu Manatuto organiza mos kampanha sensiblizasaun hodi fahe informasaun HIV-SIDA ba estudante husi Eskola Tekniku Agricola (SPP) Natarbora. (Media CNCS-TL)  

0 Comments

Leave a Comment

Login

Welcome! Login in to your account

Remember me Lost your password?

Lost Password