Redus Hahalok Soe Bebé, Inan-Aman Tenke Akompaña Intensivu Oan Sira

CNCS-TL News – Relasiona ho hahalok soe bebé ne’ebe ikus ikus ne’e soe  lemo-lemo iha sidade laran, Sekretariu Ezekutivu Komisaun Nasional Kombate HIV-SIDA Timor Leste, Rev. Daniel Marçal, hatete atu redus hahalok ida ne’e iha futuru, inan-aman sira mak iha papel importante liu hodi fo atensaun intensivu ba oan sira.

Nia hatutan ema ne’ebe soe bebé tanba inan-aman sira la fo atensaun másima ba oan sira no husik oan sira ransu livre no namora livre hodi ikus mai akontese isin rua sedu e bele mos soe bebé tanba seidauk prontu atu sai inan ka aman.

“Sim, soe bebé ne’e hahalok krimi ida, atu solusiona hahalok ida ne’e laos tenke buka tuir deit autor sira, maibe meus prevensaun ne’e mak importante tebes”, katak Rev. Daniel Marçal

Kona ba meus prevensaun, Sekretariu Ezekutivu ne’e sujere ba inan-aman sira atu akompaña intensivu oan sira nia atividade loro-loron nian no mós entidade relijioza sira atu tau-matan ba moral joven sira hodi evita hahalok soe bebé.

“Inan-aman sira atu halo akompañamentu intensivu moral ida hanesan inan-aman nian ba oan sira, atu nune’e oan sira hodi hakmatek iha uma”, dehan Marçal

Nia mós sujere ba Governu atu implementa lei ida hodi regula fatin publiku sira hanesan jardim publiku sira no mós tasi ibun sira, nune’e bele evita ema ba namora livre iha fatin hirak ne’e.

Sujestaun seluk ba Governu maka tenke regula mós fatin kos-kos sira, feto ka mane tenke kos ketak-ketak, atu evita ema lori malu ba kos sira. Governu mós presiza regula atividade Ótel sira, tanba deskonfia iha Ótel balun bele uza oras ida ou oras rua.

“Ema presiza Ótel oras ida, oras rua iha area Aeroportu, tanba hein Aviaun tarde atu ema bele uza hodi deskansa, maibe loke Ótel oras ida, oras rua ne’e atu halo saida, bele fo oportunidade ba joven sira”, Oklista ne’e lamenta

Ikus liu Rev. Daniel Marçal sujere ba Autoridade Lokal sira, liu-liu Xefe do Suco no Xefe Aldeia sira atu kontrola kos-kos sira iha ida-idak nia Bairo, hodi bele fo apoiu ba redusaun hahalok soe bebé iha futuru. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password