Prostituita Iha Liu Dignidade !

Husi: Elvis Martins

Husi títulu artikel ida ne’e leitor sira konsidera hakerek nain halo disturbiu (Penyesatan) ba publiku nia kumprendesaun, tanba atividade prostituisaun (Serbisu seksu) nunka atu fo apoiu ba dignidade umanu, tanba dala barak ema kuiñese liu katak prostituisaun ne’e nudar atividade in-moral ni-nian no serbisu ida ne’e kontradis tebes ho kultura no relijiaun sira nia hanorin.

Laiha tan liafuan diak seluk ita uza ba maluk inan feton sira ne’ebe hala’o serbisu iha area seksu nian maibe iha liafuan balun ne’ebe bai-bain kuiñesidu liu mak prostituita. Prostituita refere ba inan feton sira ne’ebe halo relasaun seksual ho mane barak ka troka ba mai parseiru seksual atu hetan osan hodi sustenta moris e familia.

Tanba sa hakerek nain fo títulu ba artikel ida ne’e mak “Prostituita Iha Liu Dignidade”, se ita kompara ho alin feton sira ne’ebe halo relasaun seksual ho sira nia namoradu (doben) iha uma aluga sira (Kos-kosan), sira prontu fo an ba mane sira ne’ebe seidauk bele kategoria ba sira nia kaben (laen), seidauk iha akordu legal ida, ida ne’ebe mak iha liu dignidade ?. Inan feton sira ne’ebe hala’o serbisu seksu la kuiñese liafuan ipokritu (munafik), maluk prostituita sira hala’o serbisu seksu hodi sustenta sira nia moris. Los duni katak atu buka moris ba an laos tenke liu husi dalan ida ne’e, maibe prostituita sira la taka an maske hatene an hanesan ema ne’ebe laiha moral ka laiha diginidade, maibe mane labele halo relasaun seksual ho sira kuandu laiha osan.

Se ita kompara tan ho alin feton sira ne’ebe halo relasaun seksual ho sira nia namoradu, bele konsidera hanesan taxa rotativa (piala bergilir). Hateten taxa rotativa tanba maske la maioria maibe iha ona realidade alin feton barak mak sofre ona ho situasaun ne’e, depois halo relasaun seksual ho sira nia namoradu ikus la sai realidade ida, mane ses an husi sira ho razaun katak Maromak mak la kesi sira atu sai realidade ida. Tanba ne’e feto ho mane fahe malu no ida idak kontinua buka iska foun ka namoradu foun e situasaun ne’e sei nafatin akontese tan ba alin feton sira, relasaun seksual mak sai identiku iha sira nia relasaun domin. Ita la merese atu dehan ita nia alin feton sira ho liafuan taxa rotativa, maibe ida ne’e mak  realidade ne’ebe akontese ba sira, alin feton sira barak mak halo ona relasaun seksual ho mane liu husi ida maske sei klosan e idade mos sei kiik.

Situasaun ida ne’e halo alin feton barak mak sofre maibe buat hotu liu ona, se mak sala, inan aman mak haruka ka tiun sira mak haruka ?. Husi hanoin hirak ne’e, ida ne’ebe mak iha liu dignidade, maluk prostituita sira ka alin feton sira ?. Ita nia maluk prostituita sira halo atividade ida ne’e tanba nesesidade familia mak obriga, osan ne’ebe sira hetan hodi sustenta sira nia moris e balun hodi sustenta labarik sira nia estudu. Kompara ho alin feton sira ne’ebe fo an ba sira nia namoradu, iha risku bot bele hetan isin rua sedu, bele kaben sedu maske idade sei kiik, bele halo abortu tanba feto mane seidauk prontu sai inan ka sai aman, halo abortu tanba tauk e trauma ba familia sira, bele mos para eskola, bele mos oho an ka tara an tanba tauk inan aman e ikus liu lakon sira nia futuru.

Alin feton sira diak liu intrega imi nia an ba mane ne’ebe aban bainrua mosu mai ho domin ne’ebe lolos no sei responsabilidade ba imi nia moris tomak no imi nia oan sira nia futuru, labele tanba deit relasaun seksual ho gostu minutu ida ka rua, imi la respeitu fali ema ne’ebe sei mosu mai ho domin. Fo an ba mane ne’ebe hadomi imi, laos ba mane ne’ebe gosta aproveita imi.

Husi hanoin hirak iha leten, hakerek nain husu ba alin feton sira diak liu keta kontente ho mane sira nia liafuan “I Love You”, tanba sekuandu kontente demais ho lia fuan ida ne’e, imi sei la hatene an sekuandu mane sira husu halo relasaun seksual. Labele tanba rona deit lia fuan “Hau Hadomi O Mor”, imi entrega imi an ba mane sira ho gratuita deit depois sira lao husik hela imi.

Sim, relasaun seksual iha relasaun metin ho nesesidade biologika ne’ebe ema hotu presiza maibe relasaun seksual ne’e so bele akontese deit entre fen ho laen. Foin namora laos ona tempu atu halo relasaun seksual, maibe tempu namora atu kuiñese malu, inspira malu, domin bele identiku ho fidelidade laos tenke identiku ho relasaun seksual. Feto sempre iha posizaun sala no vitima iha relasaun ida, tanba ne’e sai feto tenke hatene kontrola an, halo lutu ba imi nia an. Husu alin feton sira atu tetu didiak molok intrega an ba mane ida tanba relasaun seksual ne’e gostu duni ba ema hotu maibe bele lori terus tinan ba tinan. Ema barak mak sai vitima ona tanba hanoin katak domin ne’e identiku ho relasaun seksual.

Tanba ne’e, ba alin feton sira atu kuidadu an, kontrola an, prepara an ho diak, intrega an ba mane sira ne’ebe los duni atu sai imi nia kaben lolos, intrega an ba mane sira ne’ebe kuiñese ona imi nia inan aman no familia,  laos mane sira ne’ebe kuiñese deit imi iha eskola, iha dalan ninin ka uma aluga sira (Kos-kosan).

Hakerek nain husu tan ba alin feton sira atu hanoin di-diak inan aman sira nia kole (favor), inan aman sira serbisu makas tebes tamba hakarak atu haree oan sira nia susesu iha futuru. Labele lori labarik (Oan) nudar rezultadu ikus husi eskola nian, maibe hatudu ba sira sertifikadu nudar rezultadu ikus husi imi nia eskola no keta  haluha katak O Nia An Mak Sai Responsabel ba O Nia Moris Tomak“ Ami Hein !   

 

Hakerek nain Lessa Anan

No. Kontaktu: (+670) 7761 7937

Email: [email protected]

0 Comments

Leave a Comment

Login

Welcome! Login in to your account

Remember me Lost your password?

Lost Password