Estudantes ETI Maliana Laiha Aulas, Tanba Rona Informasaun HIV-SIDA & MHRS

CNCS-TL news – Estudante sira husi Ensino Tekniku Informatika (ETI) Maliana Munisipiu Bobonaro, maske iha loron Quarta – feira maibe la iha aulas ka la iha aktividades aprendizajen nian tanba rona informasaun HIV-SIDA no informasaun Moras Hada’et Relasaun Seksual (MHRS) ne’ebe hato’o husi Commissão Nacional de Combate ao HIV-SIDA de Timor Leste (CNCS-TL) no Servisu Saúde Munisipiu Bobonaro.

Ba estudante sira Diretór Programasaun CNCS-TL, Venãncio Coelho husu atu aproveita oportunidade diak ida ne’e hodi rona informasaun ne’ebe klean kona ba HIV-SIDA no mos MHRS.

Nia hatete informasaun HIV-SIDA ka MHRS sira ne’ebe karik estudante sira durante ne’e le’e ona husi fontes media social  sira bele hanesan maibe ida atu klaru liu mak informasaun ne’ebe hato’o direita husi orador sira iha momentu ida ne’e.

“Ami mai atu haforsa tan informasaun ne’ebe karik alin sira durante ne’e aprende ona liu husi media social sira”, katak Diretór Programasaun ne’e

Tanba ne’e Nia husu tan ba estudante sira atu rona informasaun ho seriu, tanba inportante ba moris loro – loron estudante sira nian.

Iha fatin hanesan Sekretariu Ezekutivu CNCS-TL, Rev. Daniel Marçal hatete nu’udar estudante bele aprende materia aprendizajen nian husi eskola, maibe presiza atu rona mos informasaun seluk ne’ebe iha benefisiu ba moris loro – loron nian hanesan HIV-SIDA no MHRS.

“Tenke buka atu aprende barak, tanba imi hanesan jerasaun foun Munisipiu Bobonaro nian”, dehan Marçal

Sekretariu Ezekutivu dehan futuru desenvolvimentu Munisipiu Bobonaro nian la depende ba jerasaun husi Munisipiu seluk maibe depende tebes ba jerasaun sira agora Munisipiu Bobonaro nian.

“Se ohin imi la estuda makas, aban bainrua Munisipiu ne’e ema seluk mak mai ukun”, katak Nia

Tanba ne’e Rev. Daniel Marçal esplika potensialidade Munisipiu Bobonaro nian barak tebe tebes, maibe atu utiliza no dezenvolve iha futuru depende tebes ba matenek oan Munisipiu ne’e nian.

“Se imi hadomi imi nia Munisipiu, diak liu ohin komesa estuda makas, tenke matenek mak bele ukun Munisipiu ne’e”, haktuir Sekretariu Ezekutivu ne’e

Nune’e mos Kordenador Programa HIV-SIDA Munisipiu Bobonaro, Sidonio Gonsalves hatete haree husi dadus HIV-SIDA, Munisipiu Bobonaro okupa segundu lugar hafoin Munisipiu Dili, ho total kazu hamutuk 81.

Haree husi statistika dadus ne’ebe iha, Sidonio husu husu ba estudante sira jerasaun Bobonaro nian tenke buka hatene informasaun HIV-SIDA no mos informasaun MHRS.

Entretantu Diretór ETI Maliana, Mateus da Silva agradese ba inisiativa CNCS-TL ho Servisu Saude Munispiu Bobonaro ne’ebe fahe ona informasaun HIV-SIDA no MHRS ba estudantes ETI. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password