Bobonaro Registu Ona Kazu HIV-SIDA Hamutuk 81

CNCS-TL news – Tuir informasaun ne’ebe relata husi Servisu Saúde Munisipiu Bobonaro (SSM – Bobonaro), katak hahuu iha tinan 2003 to’o Desembru 2018, Munisipiu ne’e registu ona kazu HIV-SIDA hamutuk nain 81.

Informasaun ne’e hato’o husi Kordenador Programa HIV-SIDA Ministeriu Saude iha Munisipiu Bobonaro, Sidonio Gonsalves bainhira sai orador iha programa sensiblizasaun informasaun HIV-SIDA ne’ebe organiza husi Commissão Nacional de Combate ao HIV-SIDA de Timor Leste (CNCS-TL) ba komunidade, estudantes, força F-FDTL, PNTL ho pesoal servisu imigrasaun sira iha Batugede – Motain, 9 Abril 2019.

Tuir Nia husi numeru HIV-SIDA ne’ebe iha, kuaze iha ona nain 23 mak mate ona, nain 38 mak oras ne’e asesu hela ba tratamentu ARV (Anti Retro Viral) no sira seluk lakon husi tratamentu.

Sidonio garante katak Servisu Saúde Minisipiu Bobonaro iha esforsu hela atu buka tuir maluk afeitadu HIV-SIDA hirak ne’ebe lakon ona husi tratamentu.

Responsavel programa HIV-SIDA Munisipiu Bobonaro ne’e realsa tan katak husi dadus ne’ebe iha, afeita mos ba fen laen kuaze iha par 12 (pasangan).

Entretantu Adjundu Diretór SSM Bobonaro, João B. M. Cardoso bainhira abertura seminariu sensiblizasaun ne’e, hatete Governu Timor Leste iha komitmentu makas, halo esforsu hotu – hotu hodi kombate HIV-SIDA iha ita nia rain.

Tuir Nia asaun kombate HIV-SIDA hanesan atensaun espesial uituan husi Governu kompara ho moras sira seluk, tanba to’o agora mundu inklui mos Timor Leste seidauk iha aimoruk hodi halo tartamentu final.

“Tanba haree ba problema HIV-SIDA ne’ebe kada tinan buras ba bebeik, Governu iha atensaun ida hodi hari’i CNCS-TL ho objetivu atu kombate HIV-SIDA iha ita nia rain”, katak Adjuntu Diretór ne’e

João haktuir atu kombate virus ne’e, la’os deit servisu husi CNCS-TL ka Ministeriu Saude nian, maibe parte hotu – hotu nia responsabilidade.

Iha fatin hanesan Sekretariu Ezekutivu CNCS-TL, Rev. Daniel Marçal hatete problema HIV-SIDA la’os deit problema komisaun nian ka Ministeriu Saúde nian maibe problema nasaun nian, sidadaun hotu nian, tanba ne’e presiza servisu hamutuk hodi kombate virus ne’e iha ita nia rain.

Rev. Daniel Marçal haktuir iha Timor Leste tratamentu ba HIV-SIDA sei gratuita, maibe iha nasaun seluk estadu la tau ona subsidiu ARV ba ema ho HIV-SIDA.

Nia dehan situasaun ne’e halo maluk positivu HIV sira tenke gastu osan bo’ot hodi sosa ARV.

“Ita gastu osan bo’ot ba ARV mos sei la kura nafatin HIV-SIDA, maibe servisu ARV nian atu hapara deit duplikasaun virus ne’e iha ema nia isin”, katak Marçal

Tanba ne’e Nia husu ba partisipante sira atu kuidadu an ho transmisaun virus ne’e, atu labele afeita ba saude no futuru ema ida idak nia. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password