CNCS-TL Fo Atensaun Ba Estudante ETCI – Gleno Kona Ba Perigu Husi HIV-SIDA

CNCS-TL – Tanba interese ba futuru jerasaun ne’ebe hanesan mos rin ba dezenvovimentu Nasaun doben ida ne’e, liu – liu iha Munisipiu Ermera, Comissão Nacional de Combate ao HIV-SIDA de Timor Leste (CNCS-TL), iha loron 3 Abril 2019, organiza tan kampanha sosializasaun iha East Timor CAFE Institute (ETCI) – Gleno, hodi fo atensaun kona ba perigu husi HIV-SIDA ba estudante sira.

Ba estudante sira Diretór Programasaun CNCS-TL, Venâncio Coelho hatete joven ka estudante hotu iha ida –idak nia talentu no potensial barak inklui iha mehi ne’ebe naruk ba futuru, maibe tenke luta ho seriu, aprende barak no tenke kuidadu an ho hahalok risku sira ne’ebe bele transmite ho HIV-SIDA.

“Ita bele matenek no iha potensial bo’ot ba futuru, maibe se la bele dezenvolve ho diak kuandu ita hetan moras, liu – liu afeita ho HIV-SIDA’, katak Diretór ne’e

Nia hatutan prezensa Komisaun nian iha ETCI, hakarak fo hanoin ba estudante sira hodi hadok an husi hahalok ransu livre, seksu livre tanba iha risku ba HIV-SIDA no bele estraga dezenvolvimentu futuru estudante sira nian.

Nia konsidera ho total dadus HIV-SIDA 21 ne’ebe registu ona iha Munisipiu Ermera hanesan bee matan 21 ne’ebe eziste ona iha sosiedade Munisipiu Ermera nian.

“Se bee matan ne’e iha ona, ema ida ba kuru lori ba uma fo tutan ba nia kaben no sei fo tutan tutan tan ba bebeik”, haktuir Venâncio Coelho

Nia esplika se situasaun nune’e bele habelar ba bebeik transmisaun HIV ba ema barak tan iha Munisipiu Ermera.

Haree husi kestaun ne’e, Nia husu ba estudante sira atu buka hatene informasaun HIV-SIDA hodi bele hahuu ona halo prevensaun.

Iha fatin hanesan Reprezentante Diretór Servisu Saúde Munisipiu Ermera Gelacio Godinho Soares  husu mos ba estudante sira atu rona ho didiak informasaun HIV-SIDA no mos informasaun seluk ne’ebe hada’et husi relasaun seksual livre, tanba ho informasaun hirak ne’e bele fo salvasaun ba vida estudante sira nia.

Nia parte mos agredese ba inisiativa husi Komisaun ne’ebe hakarak suporta Servisu Saude Munisipiu Ermera hodi habelar informasaun basiku HIV-SIDA nian ba juventude no estudante Munisipiu refere. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password