CNCS-TL Hamaluk Komunidade Suku Bemori Ho Informasaun HIV-SIDA

CNCS-TL News – Comissão Nacional de Combate ao HIV – SIDA de Timor Leste (CNCS-TL), iha loron 28 Marsu 2019 organiza tan seminariu sosializasaun iha Sede Suku Bemori, Postu Administrativu Nain Feto – Dili hodi hamaluk komunidade no juventude sira ho informasaun HIV-SIDA.

Sekretariu Ezekutivu CNCS-TL, Rev. Daniel Maçal hatete ho sosializasaun infor­masaun refere bele hatudu dalan ba komunidade liu liu ba juventude sira hodi prevene an husi trans­misaun virus HIV.

Ba partisipante sira ne’ebe maioria joven, Marçal esplika juventude nu’udar jerasaun ba futuru Nasaun nian, tamba ne’e presiza kuidadu ho HIV-SIDA hodi bele moris iha kondis­aun saude ne’ebe saudavel.

Oklista ne’e hatutan hanesan joven labele indentiku domin ho seksu.

“Namora bele namora maibe labele hanoin lai halo seksu, tamba bele estraga futuru juventude sira nian”, katak Sekretraiu Ezekutivu ne’e

Nia hatete domin mos bele sai fonte ida ba transmisaun HIV-SIDA.

“Ikus husi asaun domin ne’e mak moris kontente e hakmatek, la’os kastigu malu tanba sofre ka moras HIV-SIDA”, dehan Nia

Atu remata, ba juventude sira Nia dehan Komisaun iha obrigasaun tomak atu sosializa informasaun basiku HIV-SIDA nian, maibe atu halo prevensaun ne’e fila fali ba ida-idak nia konsensia rasik.

Iha fatin hanesan Chefe Suku Bemori, Cristalina Soares de Oliveira agradese ba Komisaun tamba bele haklaken informasaun HIV-SIDA ba nia komunidade sira.

Nia mos husu ba partisipante sira atu kontinua fahe informasaun HIV-SIDA ba familia no komunidade sira.

“Programa ne’e importante tebe tebes, tanba ne’e husu atu hatutan informasaun ne’e ba ita nia familia”, tenik Chefe Suku ne’e ba Komunidade sira (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password