“Domin Mak Bele Fo Fen – Laen Hakmatek Iha Familia La’os Osan”

CNCS-TL News – “Domin Mak Bele Fo Hakmatek Iha Familia La’os Osan”, mensagen ne’e hato’o husi Sekretariu Ezekutivu Komisaun Nasional Kombate HIV-SIDA, Rev. Daniel Maçal ba partisipantes treinamentu husi parseiru Caritas Australia nian iha Timor Leste (CATL).

Nia dehan mensagen ne’e bainhira sai orador iha treinamentu ne’ebe organiza husi CATL ba  nia parseiru sira iha Sentru Juvinil Taibesi foin lalais ne’e, 22 Marsu 2019.

Ba partisipante sira ne’ebe maioria kaben nain sira, Nia hatete moris kontente familia nian la bele depende ba osan ka sasan mundu nian, maibe domin mak bele halo familia moris hakmatek no saudavel.

Marçal dehan iha ona familia balun mak naksobu tanba osan no situasaun ne’e bele fo oportunidade atu involve an iha relasaun seksual livre no mos bele hamosu amanteijadu (perselingkuhan-red).     

Nia esplika se relasaun seksual livre no hahalok amanteijadu mak buras, bele mos iha risku ba transmisaun virus HIV no moras hada’et husi relasaun seksual sira seluk (MHRS).

Sekretariu Ezekutivu ne’e hatete impaktu bo’ot husi divorsiadu mak abandona ka harahun futuru oan sira nian.

“Kuandu aktividades relasaun seksual livre mak buras ona bele fo oportunidade bo’ot atu aumenta kazu HIV-SIDA iha ita nia rain”, dehan Rev. Daniel Marçal

Tamba tuir relatoriu dadus HIV-SIDA, katak iha mundu inklui mos Timor Leste, transmisaun virus HIV barak liu hada’et ba ema liu husi relasaun seksual.

Nia husu atu kria situasaun hakmatek iha familia laran, atu fen – laen labele naksobu, tamba moris diak ka futuru labarik sira nian iha inan – aman sira nia responsabilidade.

Entretantu ho sosializasaun informasaun HIV-SIDA ne’e, meus ida atu hasa’e kuinhesimentu parseiru CATL nian, tanba iha futuru sei konklui mos HIV-SIDA nudar programa prinsipal iha aktividade parseiru CATL nian.

Iha biban ne’e, Sekretariu Ezekutivu agradese tanba CATL fo importansia mos programa HIV-SIDA. (Media CNCS-TL)

 

 

 

0 Comments

Leave a Comment

Login

Welcome! Login in to your account

Remember me Lost your password?

Lost Password