“Foinsa’e Sira Tenke Prontu Hatete Lae Ba HIV-SIDA”

CNCS-TL News –Foinsa’e Sira Tenke Prontu Hatete Lae Ba HIV-SIDA”, hatete Diretór Programasaun Comissão Nacional de Combate Ao HIV/SIDA de Timor Leste (CNCS-TL), Venâncio Coelho ba estudante sira husi Escola Sekundariu Fundasaun Novel da Paz.

Nia dehan kestaun ne’e bainhira CNCS-TL hala’o kampanha sosializasaun informasaun HIV-SIDA iha eskola refere, Sesta feira, 1 Marsu 2019 foin lalais.

Coelho haktuir katak atu labele transmite ho HIV-SIDA, foinsa’e sira tenke hateten lae mos ba ransu livre no seksu livre.

Ba estudante Novel da Paz, Diretór programasaun ne’e esplika ransu livre no seksu livre hanesan hahalok risku sira nebe bele lori ema ba transmite ho virus HIV no mos moras seluk nebe hada’et husi relasaun seksual.

“Kontrola imi nia an hodi bele atinji futuru ida nebe diak liu iha imi nia moris”, katak Diretór ne’e ba estudante sira

Iha fatin hanesan Sekretariu Ezekutivu CNCS-TL, Rev. Daniel Marçal hatete Governu liu husi Komisaun iha dever tomak atu sosializa informasaun HIV-SIDA no informasaun risku relevante sira seluk ba sidadaun hotu, maibe atu hadok an ne’e fila fali ba ema ida idak nia desizaun.

“Ema ida idak mak halo desizaun rasik ba buat nebe diak ho buat nebe la diak ba nia moris”, katak Sekretariu Ezekutivu ne’e  ba estudante sira

Nia haktuir diak liu hanesan estudante tenke seriu estuda para bele atinji futuru ida ké diak liu.

“Futuru desenvolvimentu Nasaun ida ne’e nian iha alin estudante sira nia liman laran, tamba ne’e esforsu an estuda ba hodi bele kontribui mos ba Nasaun ida ne’e nia diak”, dehan Marçal

Nune’e mos Pedro Nunes Menezes nudar Diretór Eskola Novel da Paz agradese ba inisiativa Komisaun nian hodi fahe informasaun nebe importante ba futuru estudante sira nian.

Nia hatutan parte eskola sei kontinua kolabora ho komisaun hodi bele nafatin fahe informasaun hanesan ba estudante sira. (Media CNCS-TL)

 

 

0 Comments

Leave a Comment

Login

Welcome! Login in to your account

Remember me Lost your password?

Lost Password