Timor Leste Registu Ona Kazu HIV-SIDA Hamutuk 873

CNCS-TL News – Tuir dadus HIV-SIDA nebe relata husi Ministeriu da Saude liu husi servisu Estatistika Informasaun Saude no Unidade Nasional programa HIV-SIDA katak Timor Leste hahuu iha 2003 to’o Desembru 2018 ne’e registu ona kazu HIV-SIDA hamutuk 873.

Resprezentante Unidade Nasional Programa HIV-SIDA Ministeriu Saude, Marta Abenia dos Santos hatete haree husi kazu HIV-SIDA nebe iha, ne’e la signifika Ministeriu, Comissão Nasional Combate ao HIV-SIDA de Timor Leste (CNCS-TL) no parseiru relevante la efetivu iha programa prevensaun nian, maibe hanesan susesu bot ida tamba sidadaun hotu iha ona inisiativa rasik hodi hakbesik an ba Sentru HCT sira hodi konfirma sira nia status ba HIV-SIDA.

“Ita servisu makas hodi hatun problema stigma no diskriminasaun, entaun ema la moe ona atu ba halo teste ran iha sentru HCT”, tenik Marta Abenia dos Santos bainhira sai oradora iha kampanha sensiblizasaun informasaun HIV-SIDA nebe organiza husi CNCS-TL iha Eskola Ensino Tekniku Informatika (ETI), Fomentu II – 7 Janeiru 2019 orseik.

Marta dehan tamba HIV-SIDA ita labele haree deit ho matan maibe tenke liu husi teste ran mak bele halo deteksaun iha HIV ka lae.

Nia dehan tan atu promove teste HIV-SIDA, Ministeriu Saude establese ona Sentru teste ran iha Hospital Nasional no mos Hospital referal sira.

“Laos deit hari’i Sentru HCT, maibe Ministeriu mos fasilita tratamentu ARV ho gratuita ba maluk positivu HIV-SIDA sira”, Nia haktuir

Entretantu Sekretariu Ezekutivu CNCS-TL, Rev. Daniel Maçal mos husu ba estudante sira atu hakbesik an ba Sentru HCT sira hodi konfirma sira nia status ran ba HIV-SIDA.

“Halo deteksaun sedu diak liu para bele prevene atu labele monu ba SIDA”, katak Marçal ba estudante sira

Nia hatutan atu labele monu ba transmisaun HIV, tenke kuidadu an husi ransu livre, droga no seksu livre.

Marçal dehan tan ema hotu iha nia mehi rasik ba futuru atu sai diak liu, maibe la kontrola an husi hahalok risku hirak ne’e, ikus mai tenke lakon futuru tamba afeta moras.

Tamba ne’e, Sekretariu Ezekutivu husu ba estudante sira atu esforsu an estuda no labele involve an iha hahalok risku sira, para bele atinji futuru ida diak liu iha futuru.

Iha fatin hanesan, Cezario Barreto nudar Diretor Eskola ETI agradese ba CNCS-TL ho Ministeriu Saude nebe iha ona inisiativa fahe informasaun HIV-SIDA no informasaun risku sira seluk ba estudante sira.

Nia dehan parte eskola sei nafatin kordena ho CNCS-TL no Ministeriu Saude iha futuru, hodi fahe nafatin informasuan hanesan ba estudante sira. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password