“Estudante Balun, Lakon Futuru Tamba Domin”

CNCS-TL News – “Estudante balun mak lakon sira nia futuru tamba uza sala domin”, dehan Sekretariu Ezekutivu Comissão Nasional de Combate ao HIV-SIDA de Timor Leste (CNCS-TL), Rev. Daniel Marçal ba estudantes Sekundariu 5 de Maio Becora.

Nia dehan assuntu ne’e, bainhira CNCS-TL hala’o kampanha sosializasaun informasaun HIV-SIDA ba estudante sira iha Eskola refere, ohin Sesta, 25 Janeiru 2019.

Rev. Daniel Marçal dehan kuensi-kuensia uza sala domin mak halo estudantes balun isin rua seim iha planu, sai inan ka aman sedu, para eskola no lakon futuru.

Nia salienta liu tan katak estudante balun involve ona iha relasaun seksual livre tamba domin.

Haree husi kuensi-kuensia iha leten mak Sekretariu Ezekutivu husu ba estudante sira atu fo liu prioridade ba estuda, aprende hodi bele atinji futuru ida diak liu.

Nia haktuir tan tuir dadus HIV-SIDA nebe relata husi Ministeriu Saude katak husi total HIV-SIDA 832 ne’e, afeita mos ba joven sira entre idade 15 to’o 24 ho pursentu 28.

“Joven barak sofre HIV-SIDA laos tamba osan laiha atu uza ba eskola ka laiha oportunidade atu aprende maibe barak sofre tamba uza sala domin”, tenik Marçal ba estudante sira

Iha fatin hanesan Diretór programasaun CNCS-TL, Venâncio Coelho hateten joven ka estudante balun sofre HIV-SIDA tamba la hatene informasaun.

Tamba ne’e, Nia husu estudante sira tenke buka hatene informasaun HIV-SIDA hodi bele prevene an.

Venacio esplika dala barak ema ho idade ki’ik sira sente katak HIV-SIDA hanesan problema ema bo’ot nian, tamba ne’e lakoi buka hatene informasaun, maibe dadus hatudu oin seluk husi hanoin ida ne’e.

Nune’e mos Diretór Eskola Sekundariu 5 de Maio Becora,  Manuel Verdial agradese ba CNCS-TL, tamba divulga informasaun relevante ho situasaun nebe kuaze fo impedementu ba desenvolvimentu futuru estudante sira nia.

Diretór Eskola ne’e mos lakoi estudante sira atu para deit iha dalan klaran tamba kauza husi isin rua sedu ka afeita moras HIV-SIDA, maibe hakarak asina lai estudante sira nia sertifikadu ikus hanesan rezultadu final antes husik hela Eskola Sekundariu 5 de Maio. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password