CNCS-TL Enkoraja Estudante ESTV – EC Becora, Atu Teste Ran Ba HIV-SIDA

CNCS-TL News – Comissão Nasional de Combate ao HIV-SIDA de Timor Leste (CNCS-TL), liu  husi Sekretariu Ezekutivu, Rev. Daniel Marçal husu ba estudantes husi Eskola Sekundariu Tekniku Vokasional Ekonomia e Comersiu (ESTV-EC), atu hakbesik an ba Sentru HCT (HIV/AIDS Counseling Testing) hodi halo teste ran ba HIV-SIDA.

Sekretariu Ezekutivu dehan assuntu ne’e wainhira komisaun hala’o programa deseminasaun informasaun HIV-SIDA ba estudante sira iha Eskola refere, ohin Quinta, 24 de Janeiru 2019.

Nia husu estudante sira lalika tauk ka moe atu koko ran, tamba deteksaun sedu ba HIV-SIDA importante tebes ba ema nia saude.

“Detekta sedu HIV diak liu para bele kontrola ho aimoruk ARV (Anti retroviral), atu labele monu lalais ba SIDA (AIDS)”, haktuir Marçal

Nia dehan tamba HIV-SIDA labele haree ho matan maibe tenke liu husi teste ran mak bele hatene ita iha HIV-SIDA ka lae.

Sekretariu Ezekutivu ne’e realsa tan katak Governu liu husi Ministeriu Saúde establese ona Sentru HCT iha teritoria Nasional, ho prinsipiu  voluntariu no segredu atu hatene ita iha HIV ka lae.

Nia haktuir atu koko ran ba HIV-SIDA la presiza hein halo lai relasaun seksual mak foin ba halo teste, maibe transmisaun virus ne’e bele mos liu husi ran hanesan uza hamutuk daun tatto, seringga ka uza lamina troka malu no asaun risku sira seluk tan.

Maçal esplika ema balun hanoin katak seidauk halo relasaun seksual, seidauk tempu ba koko ran, maibe haluha tia katak hahalok risku balun nebe ke durante ne’e nia komete, tamba ne’e diak liu ba koko ran hodi hatene lolos ita nia status ran ba HIV-SIDA.

Iha fatin hanesan Adjuntu Diretór ESTV – EC, Abel do Rosario Saramento liu husi diskursu enseramentu agradese tebes ba inisitiva CNCS-TL nian nebe fihir mos eskola refere hodi halo divulgasaun informasaun HIV-SIDA.

Nia haktuir ho deseminasaun refere bele ajuda estudante sira kumpriende diak liu kona ba lalaok transmisaun virus ne’e no oinsa atu bele halo prevensaun. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password