CNCS-TL Fo Atensaun Ba Estudante Koloeiru Ensino TEKVOK Hospitalidade Konaba Perigu HIV-SIDA

CNCS-TL News – Tamba interese ba futuru jerasaun sira nian no konsidera estudante sira hanesan airin ba dezenvovimentu Nasaun doben ida ne’e mak ohin Comissão Nacional de Combate ao HIV-SIDA de Timor Leste (CNCS-TL) tun direita ba  Ensino Tekniku Vokasional (TEKVOK) Hospitalidade hodi fo atensaun ba estudante koloeiru sira kona ba perigu husi HIV-SIDA.

Ba jornalista sira, Sekretariu Ezekutivu CNCS-TL, Rev. Daniel Marçal esplika agora dadaun eskola sira hotu iha hela periodu de orientasaun ba estudante foun sira, tamba ne’e profesor sira mos konsidera informasaun HIV-SIDA importante teb tebes atu hahuu fahe ona ba estudantes koloeiru sira.

Sosializasaun ne’e hala’o iha Ensino TEKVOK Hospitalidade Becora, 17 Janeiru 2019 ba estudante kuaze atus ida resin.

Ba estudante koloeiru sira Sekretariu Ezekutivu hateten tal­entu no matenek estudante sira nian sei la dezenvolve ho diak iha futuru, wain­hira hada’et ona virus HIV.

Nia esplika tan ba estudante sira katak atu hetan futuru ida diak tenke hahuu ona aprende, hadok an husi hahalok nebe lori ema ba afeita ho HIV-SIDA.

“Kuidadu ho ransu nebe lori imi atu hetan HIV-SIDA”, katak Marçal

Nia mos husu ba estudante sira atu kuidadu ho relasaun seksual livre, tamba bele hetan isin rua sedu no estraga estudante sira nia futuru.

“Tempu namora atu inspira no motiva malu, laos tempu atu halo relasuan seksual”, hateten Sekretariu Ekzekutivu ne’e ba estudante sira

Nia dehan tan katak ho idade hanesan estudante Sekundaria sira nian seidauk tempu atu halo relasaun seksual no seidauk tempu atu forma uma kain, maibe tempu atu aprende hodi dezenvolve an iha futuru.

Entretantu Carles Fatima Guterres nudar Diretór eskola ne’e agradese tebes ba Komisaun tamba iha inisiativa diak hodi fahe informasaun HIV-SIDA no informasaun risku sira seluk ba estudante koleiru sira iha eskola ne’e. (Media CNCS-TL)  

0 Comments

Leave a Comment

Login

Welcome! Login in to your account

Remember me Lost your password?

Lost Password