CWS Remata Ona Koperasaun Servisu Iha Programa Prevensaun HIV-SIDA HO F-FDTL

CNCS-TL News – Church World Service (CWS) hanesan organizasaun humanitariu non govermental inklui mos hanesan ONG internasional ida ne’ebe durante tinan ualu servisu iha area prevensaun HIV-SIDA iha Timor Leste. Iha tinan 2010 CWS hahuu ona implementa programa prevensaun HIV-SIDA no fo liu tarjeitu ba Instituisaun Falintil Força Defesa Timor Leste (F-FDTL).

Orseik, 26 Setembru 2018 iha Suai Ball Room – Timor Plaza Dili, CWS rasik organiza workshop nasional ida hodi aprezenta relatoriu servisu durante tinan ualu nian ba parseiru relevante sira inklui Ministeriu Saude no Komisaun Nasional Kombate HIV-SIDA Timor Leste, mesmu tempu ofisialmente deklara remata ona koperasaun servisu ho Instituisaun F-FDTL iha programa prevensaun HIV-SIDA.

Ba partisipante sira Country Director CWS, Michael Coeniger apresia ho servisu CWS – TL nian ne’ebe durante tinan barak nia laran kopera diak teb-tebes ho Instituisaun F-FDTL hodi fahe informasaun prevensaun HIV-SIDA ba membru F-FDTL sira.

Nia salienta liu tan durante ne’e CWS-TL fasilita ona matadalan ida bele fasilita ona Instituisaun F-FDTL atu kontinua ho programa prevensaun HIV-SIDA iha Instituisaun refere. Husu mos ba Instituisaun F-FDTL atu kopera nafatin ho parseiru relevante sira seluk hodi kontinua nafatin programa prevensaun HIV-SIDA ba membru sira.

Nune’e mos Programa Manager CWS-TL, Odete Peloy hateten liu husi workshop ida ne’e hodi relata servisu parseria CWS-TL ho Instituisaun F-FDTL ba programa HIV-SIDA durante tinan ualu nia laran. Workshop ne’e mos atu husik hela ba parseiru sira hodi kontinua fo apoiu ba Instituisaun F-FDTL iha programa prevensaun HIV-SIDA, tamba CWS-TL remata ona ninia misaun koperasaun.

Iha fatin hanesan Brigadeiru Jenerál F-FDTL, Falur Rate Laek agradese ba CWS-TL ne’ebe durante ne’e fasilita ona informasaun prevensaun HIV-SIDA ba membrus F-FDTL.

Falur hatutan atu kombate problema HIV-SIDA presiza servisu koletivu, parte hotu tenke involve an iha programa ne’e inklui mos Instituisaun F-FDTL.

Nia dehan Força hanesan abut ba povu no rai ida ne’e, tamba ne’e tenke kuidadu an husi HIV-SIDA atu labele lori moras ne’e ba familia sira no mos labele aumenta tan problema no dezafiu iha Instituisaun F-FDTL.

Iha sorin seluk Diretór Nasional Planu no Politika Ministeriu Saude, Narcisio Fernandes iha diskursu agredese mos ba apoiu servisu husi parseiru sira hotu nian ne’ebe durante ne’e fo apoiu makas ba programa HIV-SIDA.

Nia dehan husi apoiu servisu husi parte hotu nian Timor Leste nafatin mantein ho prevalejiu kazu HIV-SIDA menus husi 1 pursentu.

Narcisio hatutan Ministeriu Saude sei nafatin iha kolaborasaun servisu ho parseiru sira hotu hodi tau matan ba problema HIV-SIDA iha Timor Leste.

Nia garantia sei nafatin fo apoiu ba Instituisaun F-FDTL hodi kontinua fahe informasaun HIV-SIDA ba membru F-FDTL sira. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password