CNCS-TL Husu Apoiu Embassador Indonesia, Finaliza MoU Ho KPA-NI

CNCS-TL News – Haree husi relatoriu dadus HIV-SIDA nebe hadaet makas mos ba komunidade sira nebe hela besik iha area fronteira maka Governo Timor Leste liu husi Comissão Nasional de Combate ao HIV-SIDA de Timor Leste (CNCS-TL) oras ne’e dadaun iha ona koperasaun servisu ida ka iha ona draff Memorandum of Understanding (MoU) ho Komisi Penanggulangan AIDS – Nasional Indonesia (KPA-NI), hodi haforsa servisu komisaun rua nian iha liña fronteira.

Konkordansia nebe defini ona iha MoU refere iha pontus importante tolu hanesan fasilita servisu CNCS-TL ho KPA-NI oinsa bele hala’o programa hamutuk hodi salva komunidade fronteira nasaun rua husi transmisaun virus HIV. Pontus segundu  atu fasilita tratamentu ka kuida no apoiu ba maluk HIV-SIDA sira tantu husi Indonesia ka Timor Leste nebe hala’o visita sai tama iha nasaun rua.

Konkordansia ikus husi MoU ne’e husu KPA-NI atu fo mos targetu programa sosializasaun informasaun HIV-SIDA ba estudante Timor Oan sira nebe oras ne’e dadaun hala’o hela estudu iha Indonesia, nune mos ba CNCS-TL tenke fo tergetu sosializasaun informasaun HIV-SIDA ba komunidade Indonesia nebe hela iha Timor Leste.

Entretantu draff husi MoU refere remata ona, maibe seidauk iha finalizasaun ka asinatura husi CNCS-TL ho KPA-NI tamba iha tinan hirak nia laran ne’e Timor Leste iha hela situasaun impasse politika no mos iha mudansa strutura husi KPA-NI nian, situasaun hirak ne’e maka seidauk bele fo apoiu ba asinatura MoU refere.

Haree husi aspeitu hirak iha leten maka orseik (Segunda, 13/7/2018), Sekretariu Ezekutivu CNCS-TL, Rev. Daniel Marçal ho komitiva sira hala’o inkontru ofisial ida ho Embassador Republika Indonesia iha Timor Leste, Sahat Sitorus hodi husu apoia ba finalizasaun prosesu memorandum ne’e.

“Inkontru ne’e ami atu husu apoiu ba Embassador hodi follow up fila fali ba KPA-NI kona ba prosesu asinatura momerandum nebe kuaze iha tinan hirak nia laran ona seidauk iha finalizasaun”, katak Sekretraiu Ezekutivu ne’e ba jornalista sira iha Embassador Indonesia, Farol Dili

Nia espera ho apoiu husi Embassador nian iha tempu badak bele finaliza lalais ona akordu ne’e.

Rev. Daniel Marçal haktuir iha tempu badak mos Komisaun sei hala’o inkontru ida ho Primeiru Ministru VIII Governu Konstitusional nian hodi husu fali renovasaun karta delagasaun puder kona ba se mak tenke ba hala’o asinatura MoU ne’e ho KPA Nasional Indonesia.

Iha fatin hanesan Embassador Sahat Sitorus apresia ho koperasaun servisu entre CNCS-TL ho KPA-NI tamba meus ida bele fo prevensaun HIV-SIDA ba komunidade nasaun rua nebe hela besik liu iha area fronteira.

Sahat Sitorus hateten programa prevensaun HIV-SIDA iha liña fronteira tenke fo prioridade, tamba HIV-SIDA nudar problema global ka mundu nebe defisili tebes atu kombate.

Nia parte lakoi komunidade fronteira rai rua afeita ba HIV-SIDA tamba seidauk iha informasaun klean kona ba prevensaun nian.

Embassador ne’e prontu atu ajuda finaliza prosesu asinatura MoU refere, tamba ne’e Nia sei hala’o kontaktu ida ba KPA Nasional Indonesia hodi konfirma kona ba asusntu ofisial ne’e. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password