CNCS-TL Husu Apoiu Igreja Kombate HIV-SIDA

CNCS-TL News – Sekretariu Ezekutivu Comissão Nacional de Kombate ao HIV-SIDA de Timor Leste (CNCS-TL), Rev. Daniel Marçal ho nia komitiva hala’o inkontru ofisial ida ho Bispo Diocese Dili, Dom Virgilio da Silva do Carmo, SDB hodi husu apoiu servisu husi Uma Kreida nian ba kombate HIV-SIDA iha ita nia rain.

Liu husi inkontru nebe hala’o iha Paço Episcopal Lecidere Dili (Terça, 31 de Julho 2018), Sekretariu Ezekutivu ne’e mos apresenta ba Amo Bispo kona ba situasaun geral HIV-SIDA.

Rev. Daniel Marçal hafoin inkontru ba jornalista sira hateten komisaun konsidera problema HIV-SIDA laos tamba problema saude deit maibe hanesan mos problema sosial, moral no etika. Tamba ne’e presiza kolabora ho parte religioza sira hodi haree ka kestaun moral no etika ema nian liu-liu ba foinsa’e sira.

Marçal hatutan ho Uma Kreida maka bele konsensializa sosiedade ho liafuan Maromak nian hodi bele hasa’ema nia konsensia.

“Inkontru ne’e atu husu apoiu servisu husi parte Igreja nian hodi salva ita nia joven sira husi HIV-SIDA”, katak Marçal

Nia hatutan Komisaun Nasional mos iha ona planu atu hala’o servisu hamutuk ho parte religioza sira liu – liu programa prevensaun ba joven sira no mos ba inan aman sira.

Iha fatin hanesan Bispo Diocese Dili, Dom Virgilio da Silva do Carmo, SDB apresia ho servisu komisaun nian tamba liu husi programa sosializasaun nebe hala’o durante ne’e bele fanun sidadaun hotu liu – liu ba foinsa’e sira atu hadok an husi hahalok hirak nebe bele hada’et moras HIV-SIDA.

Haree husi relatoriu dadus HIV-SIDA nebe iha, Amo Bispo ne’e mos preokupa tebes ho problema ne’e no husu atu servisu makas liu tan tamba foin ukun an iha tinan 16 dadus ne’e sa’e ona ba 753.

“Joven sira tenke matan moris neon nain, tamba dala barak ita la atensaun didiak ho moras HIV-SIDA bele estraga imi joven sira nia futuru”, dehan Dom Virgilio

Nia akresenta tan katak tempu joventude ne’e tempu ida nebe frasil liu no fasil atu monu ba tentasaun oi-oin, liu husi ransu livre bele tau ba pratika buat nebe sira haree no buat sira nebe sira asisti iha filme.

Bispo ne’e hatutan Uma Kreida sempre servisu hamutuk ho Governu fo nafatin atensaun ba ita nia joven sira hotu atu tau matan ba isin tamba moris dala ida deit no presiza futuru ida ké diak liu.

Nia dehan tan inan aman maka tenke iha responsabilidade bot liu ba oan sira, tan ne’e tenke fo atensaun ba oan sira, kontrola oan sira nia aktividade no haforsa tan edukasaun familia. (Media CNCS-TL)

 

0 Comments

Leave a Comment

Login

Welcome! Login in to your account

Remember me Lost your password?

Lost Password