CNCS-TL Fahe Informasaun HIV-SIDA Ba Estudante UNTL

CNCS-TL News – Comissão Nasional Combate ao HIV-SIDA de Timor Leste (CNCS-TL) organiza seminariu sensiblizasaun durante loron ida hodi hasa’e kuinhesimentu universitariu husi Universidade Nasional Timor Lorosa’e (UNTL) kona ba informasaun HIV-SIDA no informasaun risku sira seluk.

Aktividade sensiblizasaun nebe hala’o iha Igreja Hosana Bebora Dili, 21 de Junho 2018 ne’e tamba servisu hamutuk entre CNCS-TL ho parte Universidade Nasional Timor Lorosa’e.

Ba universitariu sira Sekretariu Ezekutivu CNCS-TL Rev. Daniel Marçal husu atu kuidadu an husi transmisaun virus HIV, tamba iha potensia bot atu estraga futuru estudante sira nian.

Nia dehan transmisaun virus ne’e sei la afeita ba ema arbiru, kuandu ita la lori an ba hahalok risku sira husi transmisaun ne’e.

Rev. Daniel Marçal dehan hahalok risku sira nebe bele afeita HIV-SIDA maka hahalok sira hanesan ransu livre no seksu livre.

Tamba ne’e Nia husu ba estudante sira atu kuidadu an ho hahalok risku hirak ne’e no tenke fo prioridade liu ba estudu atu bele atinji futuru ida nebe diak liu.

Iha fatin hanesan Direktor Planeamentu Monitorizasaun Avaliasaun no Rekursu Humanu CNCS-TL, Venâncio Coelho haktuir programa sensiblizasaun refere hala’o laos tamba iha nasaun avansadu sira koalia kona ba HIV-SIDA nebe iha Timor Leste mos tenke hala’o tuir, maibe sensiblizasaun ne’e parte ida atu prevene foinsa’e sira husi HIV-SIDA tamba iha ona realidade hatudu katak HIV-SIDA iha ona ita nia rain no mos afeita ona ba maluk Timor oan  balun.

Entretantu Moises Soares Magno nudar estudante sente orgolhu tamba durante ne’e seidauk rona esplikasaun klean kona ba HIV-SIDA.

Nia dehan ho informasaun ne’e bele hasa’e kuinhesimentu estudante sira nian kona ba HIV-SIDA. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password