CNCS-TL Fahe Informasaun HIV-SIDA Ba Juventude HADEZTA

CNCS-TL News – Comissão Nasional Combate ao HIV-SIDA de Timor Leste (CNCS-TL), orseik Quinta feira, 12 Abil 2018 iha Igreja Hosana Bebora Dili, organiza tan seminariu sensiblizasaun informasaun HIV-SIDA durante loron tomak hodi hasa’e kuinhesimentu prevensaun HIV-SIDA ba juventude sira nebe hamahon an iha Centru Treinamentu HADEZTA.

Vice Ministro da Saúde Dr. Luis Lobato esplika CNCS-TL organiza seminariu sensiblizasaun ne’e, refere liu ba juventude sira tamba Governu hakarak salva sira husi transmisaun virus HIV.

“Tamba ita nia juventude sira atu kontinua dezenvolve rai ida ne’e ba oin tenke iha kondisaun saúde nebe diak”, tenik Dr. Luis Lobato

Vice Ministro ne’e husu ba juventude sira kuaze 200 nebe marka prezensa iha eventu ne’e atu halo reflesaun ba ida idak nia an relasiona ho hahalok risku sira iha pasadu atu nune labele tan repete iha futuru, tamba HIV-SIDA estraga ema nia saúde no futuru.

Nia dehan prevensaun HIV-SIDA fila fali ba ema ida idak nia konsensia deit, tamba ne’e hanesan joven tenke kuidadu an ho hahalok risku sira.

Iha tempu hanesan Sekretar­iu Ezekutivu CNCS-TL, Rev. Daniel Marçal husu ba juventude HADEZTA sira atu hadok an husi ransu livre, seksu livre no transmisaun HIV, tamba estraga futuru jerasaun nia.

“Imi nia tempu atu estuda, atu aprende laos atu involve an iha ransu livre no seksu livre”, katak Marçal

Sekretariu Ezekutivu ne’e haktuir joven barak mak sai ona vitima husi ran­su livre no seksu livre ne’e.

Nia mos esplika  juventude se mak hanoin atu kaben agora, nia sei lakon futuru nebe diak, tamba defisil ona atu iha tan tempu hodi aprende.

Ita koalia konaba HIV-SIDA ne’e impaktu husi ema nia ha­halok”, dehan Marçal ba juventude HADEZTA sira.

Tamba ne’e Rev. Daniel Marçal husu ba juventude sira atu estuda makas hodi hatutan desenvolvimentu rai ida ne’e iha futuru no hadok an husi HIV-SIDA.  (Media CNCS-TL)

 

0 Comments

Leave a Comment

Login

Welcome! Login in to your account

Remember me Lost your password?

Lost Password