Estudante ICS Prepara Saúde Diak, Para Sai Profesional de Saúde Iha Futuru

CNCS-TL News – Vice Ministro de Saúde, Dr. Luis Lobato husu ba estudante Instituto Ciensia de Saúde (ICS), atu hadok an husi HIV-SIDA no prepara saúde ho diak, para bele sai profesional saúde iha futuru.

Nia kasu lia hirak ne’e iha ICS Kampung Baru Comoro, 11 Abril 2018, bainhira abertura programa sensiblizasaun informasaun HIV-SIDA ba estudante ICS sira nebe organiza husi Komisaun Nasional Kombate HIV-SIDA Timor Leste.

Vice Ministro ne’e salienta liu tan katak Estado iha ona planu ida diak ba estudante medicina sira nebe remata kursu iha nivel universitariu atu labele abandona deit nune maibe sei koloka ba Aldeia no Suku sira nebe presiza infermeira/o, mediku no profesional saúde sira.

“Ho politika asesu ba saúde no edukasaun gratuita durante ukun an kauze tinan sanulu resin ne’e presiza hadia buat balun, para bele fo benefisiu ba fovu”, tenik Dr. Luis Lobato

Nia hatutan Ministeriu Saúde tenta hela koperasaun ida ho Universidade Nasional Timor Lorosa’e (UNTL) para antes halo selesaun ba estudantes medicina sira tenke tuir nesisidade baze nian, liu liu ba Suku sira nebe presiza profesional saúde tenke buka duni ema iha Suku refere.

Dr. Luis Lobato dehan ba estudante sira atu estuda makas no hadok an husi hahalok risku sira nebe fo risku ba transmisaun virus HIV.

Iha fatin hanesan Sekretariu Ezekutivu CNCS-TL, Rev. Daniel Marçal husu ba estudante sira kuidadu ho HIV-SIDA tamba bele estraga rekursu humanu paiz ne’e nian iha futuru.

Nia hatutan potensia husi estudante sira sei la bele dezenvolve ho diak iha futuru, wain­hira hada’et ona virus HIV.

“Imi nia mehi atu sai profesional saúde hodi troka ita nia maun bot sira sei la bele realiza ho diak kuandu afeita ona ho HIV-SIDA”, dehan Marçal

Oklista ne’e realza tan katak ransu livre hanesan dalan ida atu lori ema ba involve an iha droga, tatto, seksu livre no ikus husi hirak ne’e maka bele hetan isin rua sedu, soe oan, para eskola, faluk no bele transmite ho virus HIV.

Nia dehan joven kuandu halo seksu iha tempu namora ne’e bele estraga dezenvolvimentu futuru. (Media CNCS-TL)

 

0 Comments

Leave a Comment

Login

Welcome! Login in to your account

Remember me Lost your password?

Lost Password