“CONDOM Laos Solusaun Ba HIV-SIDA, Maibe Promove Seksu Livre”

CNCS-TL News – “Condom laos solusaun ba HIV-SIDA, maibe promove Seksu Livre”, lia ida ne’e hateten husi Sekretariu Ezekutivu Komisaun Nasional Kombate HIV-SIDA, Rev. Daniel Maçal, hodi hatan ba preokupasaun balun husi Chefe Aldeia Vale de Lahane nian kona ba solusaun ne’ebe diak liu tuir sira nia hanoin oinsa bele fo prevensaun HIV ba foinsa’e sira.

Tuir Chefe Aldeia Vale de Lahane, Hermen de Araujo Magno katak defisil atu kontrola aktividade seksu livre ne’ebe oras ne’e dadaun buras iha ita nia rain, juventude barak mak involve iha aktividades ne’e inklui kaben nain balun, maske sira hatene impaktu negativu husi aktividade ne’e, maibe susar atu hapara.

Tamba ne’e, Herman sujere ba Komisaun atu define lolos kona ba metode prevensaun HIV-SIDA ne’ebe efetivu liu (Condom-red), tamba aktividade seksu livre nunka dok husi ema nia konsensia.

Nia hato’o sujestaun ida ne’e, bainhira Komisaun hala’o deseminasaun informasaun HIV-SIDA ba komunidade sira iha Aldeia Sare, Becae, Suhurama no Aldeia Metin ne’ebe partensia iha Suku Lahane Oriental, 26 Fevereiru 2018.

Hatan ba ida ne’e,   Rev. Daniel Maçal hateten Comdom la prevene ema 100% husi transmisaun virus HIV no moras hada’et sira seluk.

“Ema balun uza Condom maibe kona nafatin HIV-SIDA, tamba iha estudu balun katak pori pori Condom bot liu fali virus HIV”, esplika Marçal

Nia hatutan ema balun rai Condom iha karteira laran, maibe tamba força husi seksu ne’e makas liu, entaun defisil atu kontrola kualidade Condom.

“Condom hanesan mos ho bulaun ne’ebe kuandu ita sosa barak maibe nafatin iha balun kuak”, katak Sekretariu Ezekutivu ne’e

Nia haktuir tan katak ho failansu tekniku hirak ne’e maka ema balun nafatin sai vitima ba HIV-SIDA maske uza Condom hodi halo relasaun seksual livre.

Oklulista ne’e  esplika tan katak uza Condom laos atu fo solusaun ba prevensaun HIV-SIDA maibe sei promove diak liu seksu livre no sei estraga ema nia futuru.

Tamba ne’e, Nia husu ba juventude sira atu labele fiar liu ba Condom maibe ida idak tenke kontrola nia an, prevene HIV-SIDA fila fali ba ema nia konsensia rasik. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password