Marçal Husu Juventude Bidau Santa Ana Hadok An Husi Ransu Livre

CNCS-TL News – Liu husi seminariu sensiblizasaun informasaun HIV-SIDA ne’ebe ohin hala’o iha Suco Bidau Santa Ana – Munisipiu Dili, Sekretariu Ezekutivu Komisaun Nasional Kombate HIV-SIDA, Rev. Daniel Maçal husu ba juventude sira atu hadok an no labele involve an iha ransu livre.

Marçal hatutan ransu livre hanesan dalan ida atu lori ema ba involve an iha droga, tatto, seksu livre no ikus husi hirak ne’e maka bele hetan isin rua sedu, soe oan, faluk, para eskola, lakon futuru no bele transmite ho virus HIV.

Nia dehan joven kuandu halo seksu iha tempu namora ne’e bele estraga dezenvolvimentu futuru.

Sekretariu Ezekutivu ne’e salienta liu tan katak foinsa’e barak forma uma kain sedu maske ho idade sei kiik tamba utiliza sala domin no ikus hetan sofre.

“Domin ne’ebe mosu husi fuan bele atinji ho diak no too iha nia rohan, maibe domin balun tamba gosta buka oportunidade, bele halo ema kaben lalais, maibe bele mos para lalais”, katak Marçal iha Suco Bidau Santa Ana, 23 Fevereiru 2018

Tamba ne’e Nia husu ba juventude sira atu buka kuinhese ema antes halo kolega, hodi nune’e labele sala involve an iha ransu.

Iha fatin hanesan Espoza Presidente da Republika, Cidalia Lopes N. M. Guterres hateten joventude sira tenke hadok an husi hahalok risku sira ne’ebe la kontribui ba desenvolvimentu futuru nian.

“Hanesan joven imi tenke kontribui ba dezenvolvimentu futuru rai ida ne’e nian”, tenik Espoza Presidente da Republika ne’e

Nia hatutan atu kontribui ba dezenvolvimentu Timor Leste, joventude sira tenke hatudu ida idak nia kreatividade. Alien de hatudu kreatividade, joven mos tenke iha saude diak no livre husi moras.

Cidalia hatutan inan aman no familia sira hotu tau esperasaun ba oan sira nia futuru diak hodi bele kontribui ba dezenvolvimentu familia, tamba ne’e joven tenke buka atu aprende barak. (Media CNCS-TL)

 

0 Comments

Leave a Comment

Login

Welcome! Login in to your account

Remember me Lost your password?

Lost Password