“Feto La Saudavel, Familia Mos Bele La Saudavel”

CNCS-TL News – “Feto la saudavel, familia mos bele la saudavel”, lia hirak ne’e hato’o husi Espoza Presidente da Republika, Cidalia Lopes Guterres bainhira abertura seminariu sensiblizasaun informasaun HIV-SIDA no informasaun kona ba moras kankru ba espoza sira husi Oficiais Forsa FDTL iha Komponente Navál Hera, 27 Janeiru 2018

Cidalia hateten se feto rasik maka sente la saudavel ka saude la diak, defisil ba feto atu kuidadu sira nia familia.

Nia hatutan feto tenke moris livre husi moras tamba feto nudar pilar importante iha sosiedade nia let, husi feto maka bele hahoris jerasaun ba jerasaun nebe sei sai responsabilidade ba nasaun iha futuru.

Espoza Presidente Republika ne’e garantia ho deseminasaun informasaun kona ba HIV-SIDA no moras kankru, meus ida atu hariku liu tan espoza sira husi Oficial Forsa FDTL sira nia hanoin oinsa atu desenvolve familia ida nebe saudavel.

Tamba ne’e, Cidalia husu espoza Oficial Forsa FDTL sira atu rona ho didiak mensagen husi meritu ka orador sira nebe lori materia kona ba informasaun HIV-SIDA no mos moras kankru nian, tantu liu husi materia, dadus no imagen.

Cidalia husu ba feto sira nebe partisipa iha seminariu ne’e atu labele moe deklara ba laen no mediku sira karik iha moras, nune labele lakon vida sedu tamba moe.

Espoza Presidente da Republika, Cidalia Lopes Guterres hateten nudar inan nasaun nian, Nia preokupa ho moras kankru nebe hamate ona inan feton barak inklui mos moras hada’et sira hanesan virus HIV nebe buras ona iha teritoria nasional.

Iha fatin hanesan Sekretariu Ezekutivu Komisaun Nasional Kombate HIV-SIDA, Rev. Daniel Marçal hateten liu husi seminariu sensiblizasaun ne’e hodi koalia ba malu kona ba problema HIV-SIDA nebe too agora mundu seidauk bele rezolve inklui mos Timor Leste.

Nia haktuir maske mundu defisil fo solusaun ba problema HIV-SIDA, maibe ema ida idak bele rezolve problema ida ne’e liu husi prevensaun ba ida idak nia an.

Marçal hatutan karik laiha kuinhesimentu klean sei sai risku ba transmisaun virus ida ne’e.

Nia haktuir tan katak tuir dadus nebe iha, inan feton barak maka sofre ona tamba HIV-SIDA.

“Laos deit ba inan feton sira nebe hala’o servisu seksu, maibe inan feton hirak nebe ita la espera maibe akontese no sai vitima ba HIV-SIDA”, dehan Marçal

Iha biban ne’e, Rev. Daniel Marçal husu ba espoza Oficiais forsa FDTL sira ho informasaun nebe sira hetan bele hatutan tan ba ema seluk liu liu ba oan sira.

Entretantu seminariu sensiblizasaun ne’e organiza husi Gabinte apoia aktividade Kônjugue Presidente da Republika no servisu hamutuk ho Komisaun Nasional Kombate HIV-SIDA no komisaun organizadora kompetente sira seluk, hodi komemora loron ezistensia F-FDTL ba dala 17 nebe sei monu iha dia 2 Fevereiru 2018. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password