EMHIV Husu Apoia Nutrisaun no Buka Solusaun Ba Problema Bolsa da Mãe

CNCS-TL News – Ita nia maluk sira nebe moris hela ho HIV (EMHIV) iha Timor Leste, husu ba Espoza Presidente da Republika liu husi Gabinte apoia aktividade Kônjugue Presidente da Republika nian atu apoia nutrisaun no buka solusaun ba problema bolsa da mãe nebe agora dadaun sai problema  bo’ot ba sira.

EMHIV sira hato’o kestaun hirak ne’e bainhira iha dialogu entre Espoza Presidente da Republika ho maluk Timor Oan sira nebe oras ne’e dadaun moris hela ho virus HIV iha Casa de Recuperação da Saúde Suco Tibar – Munisipiu Liquiça 29 Janeiru 2018, nebe organiza husi Komisaun Nasional Kombate HIV-SIDA.

Tuir fontes EMHIV ho inisial OS katak durante ne’e sira hetan ona apoia nutrisaun husi Ministeriu Solidariedade Social maibe la subsiente tamba ne’e sujere ba Espoza Presidente da Republika atu apoia tan nutrisaun ba sira.

“Ita haree ba realidade EMHIV iha Timor Leste balun iha kondisaun ekonomia nebe ita kasian tebes, maibe aimoruk ARV nebe konsume ninia dosis makas tamba ne’e afeita tebes ba sira nia saude”, tenik OS

Problema seluk nebe OS relata ba Espoza Presidente da Republika kona ba problema bolsa de mãe nebe antes ne’e oan kiak husi vitima HIV-SIDA balun hetan ona maibe tamba kriteria husi Ministeriu Solidariedade Social halo sira tenke lakon sira nia bolsa de mãe ne’e.

“Atu hetan bolsa de mãe tenke iha deklarasaun husi Suco, maibe iha Suco sira tenke deklara ho lolos kona ba moras saida maka vitima sira infrenta, maibe tamba problema stigma no diskriminasaun maluk vitima HIV-SIDA sira la brani atu fo sai sira nia identidade moras”, haktuir OS

Hatan ba kestaun hirak ne’e, Espoza Presidente da Republika, Cidalia Lopes Guterres hateten Estado Timor Leste sei garantia direitu nebe hanesan ba sidadaun hotu atu hetan protesaun nebe hanesan nune mos ba vitima HIV sira.

Nia husu ba EMHIV sira atu iha esperansa nafatin as ba moris ne’e, tamba moris tuir Maromak nia planu ba ema ida idak.

Cidalia saliente liu tan katak Estado sei apoia social nafatin ba sidadaun sira nebe presiza liu liu ba kiak sira nune mos vitima HIV-SIDA.

Ba preokupasaun ne’e, Cidalia garantia sei buka meus hamutuk ho Komisaun Nasional Kombate HIV-SIDA hodi apoia nutrisaun ba maluk HIV-SIDA sira hodi garantia saude nebe saudavel hanesan ho sidadaun sira seluk.

“Preokupasuan ita bo’ot sira nian hau sei buka marka audensia ho embaxador sira iha Timor Leste, hodi aprezenta ita preokupasaun hirak ne’e ba sira”,  tenik Espoza Presidente da Republika

Iha biban ne’e, Nia agradese ba Komisaun Nasional Kombate HIV-SIDA nebe durante ne’e fo tulun no tau matan ba maluk sira nebe moris hela ho HIV-SIDA.

Iha fatin hanesan Sekretariu Ezekutivu Komisaun Nasional Kombate HIV-SIDA, Rev. Daniel Marçal hateten dialogu ida ne’e nudar inkontru regular nebe Komisaun sempre hala’o kada fulan tolu ho EMHIV sira.

“Hamosu inkontru ida ne’e hodi koalia ba malu, rona sira nia preokupasaun, kontrola sira liu-liu kona ba oinsa hemu aimoruk, oinsa atendimentu konselor sira nian durante ne’e ba sira, oinsa ho ho problema stigma no diskriminasaun”, haktuir Rev. Daniel Marçal (Media CNCS-TL)

 

0 Comments

Leave a Comment

Login

Welcome! Login in to your account

Remember me Lost your password?

Lost Password