Parteiras Munisipiu Dili, Loron Rua La Tama Servisu Tamba Rona Informasaun STI & HIV

CNCS-TL News – Komisaun Nasional Kombate HIV-SIDA Timor–Leste (KNKS-TL) servisu hamutuk ho Asosiasaun Parteiras Munisipiu Dili organiza seminariu durante loron rua hodi fahe informasaun prevensaun Sexual Transmission Infection (STI) no informasaun kona ba prevensaun HIV ba Parteira sira.

Sekretariu Ezekutivu KNKS – TL, Rev. Daniel Marçal hateten parteira sira mos presiza iha kuinhesimentu klean kona ba STI no HIV para bele redus prekupasaun maluk HIV-SIDA sira nian kona ba stigma no diskriminasaun.

Nia hatutan iha Timor Leste alien de hasoru problema HIV-SIDA ne’ebe defisil tebes atu kontrola, hasoru mos obstaklu bo’ot ida mak stigma no diskriminasaun hasoru ema moris ho HIV sei aas tebes.

Nia dehan, stigma no diskriminasaun ne’ebe akontese mai husi familia, sosiedade no barak husi pesoal saude sira, tanba ne’e professional saude sira tenke iha kuinhesimentu kona ba transmisaun virus ida ne’e.

“Importante tebes ba parteira sira atu iha kuinhesimentu hodi ajuda ema no proteze sira nia aan tanba sira servisu iha risku,” Marçal kazu lia hirak ne’e ba jornalista sira hafoin abertura seminariu ne’ebe hala’o iha Salaun inkontru Igreja Presbiteriana – Caicoli, 11 Desembru 2017

Sekretariu Ezekutivu ne’e espera, ho kuinhesimentu ne’ebe parteira sira iha bele hadia diak liu tan atendimentu ba iha pasiente sira, liu –liu inan isin rua sira ne’ebe moris ho HIV.

Nia mos, husu ba professional saude sira atu rai pasiente sira nia konfidensialidade (kuidadu segredu) labele diskrimina sira, atu sira bele sente konfortabel hodi asesu ba tratamentu.

“Pasiente balun mate la’os tanba HIV, maibe tanba hahalok diskriminasaun, ne’e sira sempre keixa,” dehan Nia

Iha fatin hanesan, Prezidente Asosiasaun Parteira Munisipiu Dili, Sara Maria rekonese katak ema balun halo aktu ida ne’e hasoru pasiente sira, entaun pasiente sente triste no ofendidu.

Nia dehan, tamba tauk da’et virus HIV, hena kama ne’ebe ema moris ho HIV toba bainhira baixa iha hospital, sira hasai sunu hotu depois pasiente sira alta.

“Parteira sira nia prezensa besik liu ba inan, oan ho familia sira, espera ho kuinhesimentu ida ne’e bele muda sira nia hanoin atu hadia atendimentu ne’ebe diak liu no tane aas dignidade atu pasiente sira bele hetan kuidadu saude ne’ebe kualidade”, Nia hateten

Iha parte seluk, Diretora Saude Munisipio Dili, Agustinha Seguerado Saldanha hateten sei kolabora ho KNKS-TL no Asosiasaun Professional Saude sira, hodi realiza atividade hasa’e kuinhesimentu pesoal sira nian kona ba transmisaun HIV.

“Nia hatutan prioridade husi Ministeriu Saúde nian mak hasa’e kuinhesimentu no hasa’e kobertura iha fasilidade saude hotu.

Nia salienta liu tan katak ho atividade sosializasaun sira ne’e bele muda ona ema nia hanoin hodi kontribui ba redus stigma no diskriminasaun ba maluk sira ne’ebe moris ho HIV atu sira bele sente livre asesu ba tratamentu. (Media CNCS-TL)

0 Comments

Leave a Comment

Login

Welcome! Login in to your account

Remember me Lost your password?

Lost Password